ZUM 80-STEN GEBURTSTAG (Sketsch) (Für zwei „ältere“ Ehepare) Nuwent , Tinj ! Nuwent , Mri! Hast ein beste Tiet fe mie? Ju , kom nen en sat die dul. Wot es Nies, vetal mi mul. Ha tein Nies, etj hab ne Frog : Niefelds Neel haft doch jekrocht ... Wot sol wi ar dan scheunet schente? Ju , dot mot wie noch bedente... Dej haft von olem ol jenuch ! Flesjt ein scheunet Leudabuch ? Nee , seuj kon je doch nesj senje , (singen) Wie deune bleus det Jelt vebrene. Flechjt wot feinet ontetrate ? Tem en ar Lewe optewatje. Dot jeft seu kou-schit-jreune Ratj, Dot Materjal äs soja kratjt... En set ok wärtlesj schratjlesj schmok, Ätj wold - be ok soon schmoken Rok ! Deu haft voll ihre Kemeud , En send dej Ratj ok ol nesj meud ! Ju , äs ok schwoa sesj üt - tedente Wot mot tachentesj te - schente! (--Bim Törjt ein Beld, wout nejch fel Jelt, etj sie mi sächa , dot jefält ! --Mitj , dü best ein Molodez !) ( unterhaltung der Männer) Haft ol mo wenechj unjre Mez ! Wie sänd mot tachentesj , noch jong , Deu Tiedels uba bleus - mo Schont... Wie tiene ons noch soja freije Dot dej noch wenichstens bet tjreije !

Flesjt ein Nachthamd , wom , üt Poßem , Ütjeneit hie opem Bosem... Nesj töu lang , en nesj töu wiet - Freet sech ok dei öle Jit... Jleujwst dej Honj noch optewatje ?! --Deu Wiwa rede Oschjebrate ! (hi-hi-hi) ( Männer) Dü , etj weut ,wot wie ar schente , Bieta kost die dot nech dente : Etj ha ein Banke göudet Schmea... Wot - fen Schmea? Dan wies mul hea... Hea , det mot det Banke sene... Halpt von Büte en von Bene Etj doktre mi nü blöus mot det , Tetj wöu schmok etj sie en wet ! Ju ,mi det ok oles woj , Von mienem eischjen Jemoroj... ! Woscht mi ok söun Schmee besorje ? Ju , dot deu"tj dan ewamorje... . Etj niem dot en, en mok Kompräss , Det halpt vom Klimaks en vom Sträss. Etj niem dreu mul am Dach ein Schlok , Dot es söu maklesj dan äm Bok ! En jefst din Ölem ok met schloke , Det es söunt etem emma broke !!! Wot hast do oles nän - jeriet ? Von dot ne Japs , von det ein Biet... Dej wot sesj freje , onse Nell , En brokt nesj moja äre Brel . Äs nesj krank, haft tejne Sorje ... Wot ok tachentesj ol morje ... Det äs dot posende Jeschäntj ! Dot hast dü rasjt ,Meri ,etj dentj . Tienj , wot tratjst dü morje on ? Dochwol min schwotem Sarafon ...En dü ? Etj woit noch nesj jenow... Ein hokjet Tjlojt mot korte Mow . Etj mot fendog noch viel jerude , Te ite moke , min ölen bude... Na ju ,wie gune dan nü Hüs.. O "teuj ,Meri , Ju ,Tina , tschüs ! ( in ein großes Glas (3 liter) Cola reinfüllen, Aufkleber "SCHMEE", kommen alle wieder) Nü sänd wi jekume tem Jubilej , En wäale von Hoten di posdrawlee : Bliw dü äma tjrasch en kosch , Si te dienem Jit nesj bosch , Tetjt äma straks nu fere ,

En döut junt pentlesj schmere ! Dan woscht jesond en schmoktjes bliewe , En woascht Lost tjrieje tem romdriewe - Meja lache,wenja hile , En wie wore äma Podruschkes bliewe!!!

***** (Lied, wird gesungen auf die Melodie von „…потолок ледяной...“) En Oljdendorf, en Proisesch, En diesem schmoken Darp En ere tjline Weunung, Do wune Pa en Ma. Det es bi an jemitlesj, Det jet den soja schein, Det Hüste wom en maklesj, Em Godte oules jreen! Uba dan Op einmul Wot jepotat! We von jünt, Ma en Pa, Haft Jebortstag? En det Hüs Wot nü vol - Ole Tenja Lache, toube ola rom Ouda senje! Nü es de jratste Sorje Dot oula wore sot! Weränj en Schmont, en Tjrenels, Peljmeni en Kompot! Nü es det Ite fodesj, Nü sat jünt oula bi… Uba de Tenja twiwle… Sej wule …. Schaschlyki! En dej Pa Jet dan lous Fleesch beschtale, En de Ma

Fangt ol on Zeple schale Schniede dan Oules tjlin, Fleisch en Schtetja…. Uba dot Wot jewäs Soja schmatje! Fendog es scheinet Wada, Schlapt ope Bentj de Kot… Tefrid es de Brigada, Nü send se oula sot! Tem freu en jletjlesj sene Seu wenesj brokt de Mensch… Fe onse baste Ellre Hawi noch nen Wensch: Pa en Ma, Blift noch lang Freu en monta! Wensche ole Tenja jünt Viel Jesontheit! Det jet ons schein Hea bi jünt, Schmatjt det Ite… Det Rezapt Vom Schaschlyk Nesj vejite!

Schauspiel "DE SCHEJPJE HAHN" (курочка ряба) (Die Schauspieler dürfen gern ihren Dialog frei gestalten, solange

es nicht vom Thema abweicht) 1) Opa Pojta 2)Oma Ouna 3)Nachbarin Leinsch Die Stimme hinter den Kulissen: Poust op, ji Jonges en Mejales, Etj well jünt ne Jeschecht vetale: Op ejne Sprok, dej jidra kon, Ok Tjent,ok Frü, ok oola Moun. Wot etj vetal, es ok bekount: Pessied det mul em Plotdietschlont. En einem Darp ve lange Tiet - Dot wie von Eint nesj soja wit- Lewd ein mul ein oolet Po. Dei leewde sesj sou wondabo! Nu olemnu Netjels wire doj, Tonte Oun en Onkel Pojt! Sei wiere om, uba tofreed, Von dehn vetaletj mul n po weed:

Dej Onkel Pojt en sinem Ella Hod noch n seuja stotjem Welle! Sin Redje boch sesj ol gons krom, Uba heu schouft noch schaftesj rom! Em Hof hod hei jenuch tem tjeamre – Feije, gruwe ouda temre. Noch deid bion dej oole Netjel Fe de Mensche Steiwle flete. Hei wie jewes tein rastja Schosta, Uba heu houd en schosta-Kouste, En mot Meij en ein beht Jletj Sot opem Stejwelloch det Fletj. Dot mieschte fletjd hej ferem Jonze - Sine Frü ded jiren donze! Jidre Wetj koum Jonz vebi, En brocht de Scheu von sine Mri. Iewresj we ok Tonte Oun, Sej schoft nechj wenja os ea Mon. Helt oles rein em Hüs en Gode, Nü hod se ok ol oles vodechj Te Unkost reed ne Monajret. Nü sout se bi e Pojt en tjnet.

Sitzen zusammen auf einer Bank, das Lied “Oh,du Süsste…“ klingt, sie schauen sich liebevoll an, spielen „laduschki“ Dann steht die Oma auf: -„Wel wie nesj ol Unkost ete?“ -„Jo, mi bort ol ok de Mog! Wot hawe vendog scheinet?“ -„Di hongad doch nu Monajret… Dej hah'tj di ok jekokt! Scheun met Bota en Zoka!““ – freuen sich beide. Oma deckt den Tisch, wollen grade essen, da kommt die Nachbarin herein -„Na,wot jeft det scheinet!“ -„ Na uba, Leinsch! West mot ons Unkost ite?“ -„Wot ha ji jeschedet? Ou, Monajret! Nu dej hongat mi ol lang!“ -„Sat di bie, Nubasche!“ -„Na schein! Hast mi ewariet!“ - essen zusammen. -„Leinsch, vetal mul, wot jeftet fe Nies!“ -„ U-u-u-u…..Wot fe Nies… Dü weits doch, Pojt, dot etj söu wenesj ema weut… Bleus dot, wot mi de Mensche vetale… Weutst, Derze Hen sine Mejal speziet mot Pejtasch Jit sinj Seen!

Det wot jewäs ne Tjast böuld jewe! De lostje Mri, deu Aubram –Jonsche, deu dejd doch äma jiren donze, haft sesj nü dem Fout jebroke, nü mot heu selfst sechj Ite koke! En Horems Wanj haft siene Katj ve dot fühl sene vedatjt! En jestre Uwent dej oole Detj fluch besupe vone Bredj! Haft noch seja Jletj jehot

-noscht pesiet, bleus petsche-nout… Uba! Ätj mot mi nü aul seua spöude.. Etj wensch junt noch vehl aulet göude! Es ol lut jeworde…“ Geht raus. -„Dej Lejn kon uba vetale… Dej oole Plüdaeifte!“ -„Jou, onse Nubasche weit ok o-o-ules…

-„Ok wan min Radio tweij es, wi tjrije oulet Nies met…“ – schmunzeln beide. -U—u-a-a-….Wel we ok schlupe gune? More zemorens mot we tiedesj op…“ -„Tjri etj noch ein Göude –Nacht-Kostje?“ –„Uba sesja!“ Oma küsst in – gehen raus.

2....

Hallemul! Dot oulawechtje (allerwichtigste) Vegot etj mejst bi dej Jeschechjt! De Netjels deide ol noscht höule…. Tejne Schwien, die Mest veweule, Tjeine Kou, die Fooda brokt – Dout wia an oules oul tou drock. Uba äm Stouljte henjre Kut, Vestopt em huge Warmetjskrüt, Helde se ne scheepje Han! Dei wie seu leewtulesj to an - En sorjd dot penjtlesj jida Dach N freschet Ej em Ströunast lach. Zemlechj tiedesj aul zemorjens Jentj Onkel Pojt de Han besorje… Freschet Wuta, Haundfol Schröut, Dot schmatjd de Han doch seja goot! Toofried veschtradjd se ere Flesjte En koum sech seuja stroum en wechtechj! Sei tetjd am dan söu frentlechj oun , En…schwupst det Ei ne Pojt en Oun!

Oma (werkelt in der Küche, ruft:) -„Stu op, Poita! De Preps es reed! Dü motst noch ons Hante besorje! „ -„Etj si ol unjaweis, Ouna! Wel we dot Ei fendog brude? Ouda mokst ons leewe Rieeja?“ -„Mi es dot gons endeunt, Pojta! Hul ischt mul dot Ei!“ Auf einmal Hünnergegacker, Getrampel, Zurufe … -„Ou,joma… Wot es det,nochemul! Ouna!Ouna! Tetj!“ Kommt der Opa gelaufen mit einem Grosen goldenen Ei in den Händen. -„Wot äs nü pessiet? Hast di wot onjedune?“ – erschrocken. -„Ouna! Tetje mul! Det Ei! Det Ei es goldesj!“ -„Uba Pojta! Hast die de Uge nesj jewosche?! Wot sochinejscht dü do?“ -„Tetj doch mul selfst, Ouna!“- bringt ein grosses „goldenes „ Ei rein. -„Na uba liedetzejt! Wot es det nochemul?!“

-„Etj saj je di – det Ej es üt Gold!“ -„En wertjlesj….Wöu kon seuwot bleus pessiere!?“ -„Sezt dü…? Hiescht dü…?“ – schlägt mit dem Ei auf die Tischkante. -„Uba pos doch op, Pojta! Dü schleesjt et noch kepot!“ -„Ninesj nesj! Det es üt renem Gold! Nü send wi retj, Ouna!“ -„Jü, nü send wi äntlesj retj, Poita!“ – schlegt die Hände zusammen, freuen sich beide! Legen das Ei auf den Tisch, bewundern es still, schweigend. Jeder überlegt sich was… -„ Nü tie wie ons oules tjeipe, nu wot ons jankat!“ - Oma -„Wel we ons noch en po Heina teipe….? Dan hod we jenuch Eja…En ne Keu…. Dej woscht dü dann jida Morje maljte, dan tie wi ema fresche Maltj drente en habe Schmont en Bota!“ -„Ju! Etj wo de gonse Oabet döune, en dü blöus Schmont lete!“ – Oma empört. -„Wi tiene ons ok ne Mejal hoole, tem Oabede…“ – vertreumt… -„ Dü lestja Kuta! Ne Mejal wot hei sesj hule! Oole Kelosch dü!!! Nü wo etj mul wot saje! Schmont en Bota en oulet oundre , wot scheen schmatjt, tiene wie ons ok söu teupe! Etj wo mi os ieschtet ne schmoke nije Üa toolae! Deu jankat mi ol lang! En doi hab etj mi doch wol vedeunt!“ -„ Na tete mul! Ne nije Üa! Op diene veschrompelte Oormtes! Det lachat mi söu rachjt! Uba goot – teip! Dan teip etj mi… en niet Radio! En nie Steiwle! En ne Pelzmez!“ -„ Uba! Uba! Nü uba n bit langsama! Etj tjri eine einsje Üa, en dü schtopst di fuz de Fope vol! En dobi hab etj di min gonzet Leewe lang bedient en bemotat… En det es de Dank do fe…!“ -„Dü hast mi bemotat?! Eule Schlor dü! Ätj! Ätj ha die betotat, en söun schworet Oseliewe jehout, blöus dot dü oles host, nu wot die jankat! En nü well etj einmul ok on mi dente!“ -„Dü felogna Kosebok! Dot es doch niemuls Woh! Etj wud di söu eint om de Uhre barschte..!“ -„Frü! Best dü fretjt jeworde? Nü hast gons den Respätj velore… Etj si ema noch dot Hopt em Hüs!“ - „Dü – det Hopt ? Etj mot mi deutlache! Wejt s wot…..“ - „Na wot…?“ – schauen sich böse an ,stemmen die Fäuste in die Seiten, drohen sich gegenseitig mit der Faust. Hören auf enmal Schritte, erschrecken: -„Ha,do tjemt we!“ -„Det es jewäs ol wada Lejnsch! Wot wel deu Frü blöus ema bi ons!“ -„Schwend, veschtop det Ei! Feschtop det Ei!“ -versuchen überall das Ei zu verstecken. Auf einmal fellt es runter und ist kaputt! Die beiden erstarren. In dem Moment kommt die Nachbarin rein. -„Fuj! Nu wot schtänjtat det he seu schratjlesj! Fu! Det es je nesj üttehoole! Wot deu ji he?“ -„…………………………………..“ -„Uba liedetjsaj! En fühlet Ei?! Wot wel ji domet?! Uba dot schtenjt! Uba schäntlesj! Etj gu mo leewa…“ Oma fegt alles zusammen, Opa schaut nachdenklich zu… setzen sich beide auf die Bank und sitzen still… -„Ons Ei…Ons Goldejte… Nü send wi olwada om…“ -„Weuts dü wot,Ouna…Es ok fiel bieta seu…Nü brok we ons nesj moja schtriede…“ -„Uba wöu rasjt dü hast, Pojta!“ – nehmen sich an die Hände, es spielt die Musick „O, du Süsste..."

Nu dej Moral brok ji nesj gruwe – Dej lechjt je äma gons von buwe: Det Leewe – dese schejpje Han, Es seja spusesj han-entwan…

Det loont sech eine Sach too meatje : Det Goldei mokt nech äma jletjlech… Dot, wout ons blenjtat vere Uge, Set goldesj üt… mo bleus von buwe…

Ejn jela Rejen roschelt henjrem Fensta...

En kloopat on...En jet febie... Söu, os een Tjent, jeklotat op en Benjste, Tetjt niescheresj nü mi... Jenow söu frentlesj, os ejn Tenjalache, Schinjt de Son be mi em Fensta nean! Jeft ope Welt seu fiele schejne Sache -

Dem Jele Rejen hab etj blöus em Seen... Heuj kom numedach, stell en wom, en frentlesj, Os wool heuj saje: "Oles holf söu schlem... Lut leis, wan Kroft nesj hast tem höule... En wot dü broke dest, dot nem..." Det Jele röupt: "Kom, kom nu mi mul rüta, Jeasch op dej fresche, sonje Loft! Lut diene Sorje mot dem Wend vegune, Etj schenjt die eine nije Kroft!" De jele Bleda wesche mi de Trune, En hoje wom en liebevol min Hot… Dej jele Rejen es en Wondasehen, Etj wojt nü, dotet bieta wot…

Gu ouleen em Hofst speziere ... Oules wot ätj sej, es mint. Manke Asta blenjtjat Schpanwiew, Jrept dot lazte Sonnenschien... Freesch en klo dej blewe Hemmel, En de Boojm em goldnem Rount... Bloos min Hot kon det beschriewe - Tjeine Tung en tjein Festount! Krüse, bonte Bleda tjriesle Lecht en langsom unjre Foot... Roschle stell... Os wan sei senje Bloos ve mi eha oolet Leed... Dot, wot den dej Wend jeliet hod, Os sej jong wiere en jrein, Vonne Woljte, en von Bloome, En vom Muneschien em Dreem... Von dem Jletj, wot Vejel habe, Vonne Wartjle enne Ed, Von Jeföole, dej bediesle, Fil te groot ve onse Wied... En vom wome Somarejen, En von Tenjahänj em Saund... Vonnem Kraunte huch em Hemmel, En vom Lewok enne Haunt... Dei Jedanke send ok Bleda - Eent num aundre fole rof... Kloh en frentlesj, os de Hemmel, Schwo en donkel, os dout Grouf... Bleda roschle.... Bleda senje Freid en Trüresjtet tojletj. Eare Leede wertje Wonda, Moake jletjlech mi en retj!

ÖLE FRÜ De Stuw von eine öle Frü... Seu oultmodesch en stell... Ein Heteldatjste ewrem Desch, Ope Kemeud ne Brel... De Biebel lecht op ere Steed, Tem broke äma reud, Sei lest söu vel dorüt, ok wan Sei schoblechj es en meud Henjt ope Wound ne gröute Klok, Dej jide Stond lüd schleet, Dot dissa lange-lange Dach Vebi mul gune det. Es stell om ahr nü ere Welt, Det gonse Lewe - hie...

Noscht retjet äs en ihrem Schop, Uba fe ar seu dia... De Wound feleanjs henjt enjeroumt Ihr gonzes Lewenswotjt... Ol ihre Tjenja, Enteltjenja, Lostesj, stroum en stotj. Sej bangt sechj söu nu oulen den, Blöus send se ola wiet... En deu, waut ope nubasch wune - Habe teine Tiet... De Tiet... Deu Dach es ar söu lang... Wea helt deu Tiet blöus oun? Freja rand se söu schwend wachj, Os sei noch bieta koun... Os sej noch jonga wie en stotj, jenjtj ar oles schwend: Em Stool, em Gode, em Kolchos, Besorje Moun en Tjent... Söu fiele Tjenja gröutjemokt, Fe jidrem Loiw jehout... Söu om en schwo, os dot dan wie... Uba seu retj ea Hot. Söu pienechj ol dej schwore Joh Derch Honga, Tjrechj en Dout Mot äre dene Meteshänj... Die wurde niemuls meed. Nü ledje ere oule Hänj Gons rüechj ope Schout... Wu äs nü äre Kroft jebliewe? Ouf dout mo eina weet... Uba dei eine Oobet noch Det sei ok Dach, ok Nacht - Sei biedt te Jeusus dot dei Herr Bi äre Tjenja wacht. Söu fiel wie äre Tiet noch diet Biedt seu om onse Seul... En ehre Stuw ne öle Frü, Söu öultmodesch en steel....

MINE PAPALBEEJM Les schokle em Wend dej Beejm… Dej Pappalbeejm… Min Pappeldreum… Omrounde min Hüs, mine gounze Welt, Verbeene de Ied en dem Hemmel. Noch es nech Tiet, dot etj se velut, Noch es nech Tiet fe Osch en Glöut, Noch schriewe em Wend dej jreene Weed Mine Lewensjeschecht. Bloos min Hot… Dot uhnte dem Ovscheid, En flug entjejent, en mohtjd sech oules – Dot lüde roschle dej Pappelbleeda, Dot leese Knacke dej Asta. Mine Schokel tweschen twei dete Stoume Dej, os en Tjent, one Hänj sej höule, Es ladech… Uba schwenjt noch ema, Os wan sej es gruds velute…

(Ne Tjebhajeschejcht) Peitatje en Leinatje Rande mul von Tüs. De Stahp, de Retsch dan ewre Bredj – De Wach wie seja krüs. Peitatje en Leinatje

Koume nü num Wöuld. Sej hongade en frure aul, En groselde sech böuld. Pejtaje en Lejnatje Wule nü bloes tredj, Blöus funke nech dem Wach nu Hüs, Tjein Retschtje, tjeine Bredj… Deej bistade en bistade, Em Hottje Angst en Trüh… Op einmul schtund en Zokahüs, Ver den, en eine Frü. See kroagd en beud an ete oun Mot ere lestje Stemm, Stoppd Pejtatje em Häinahock, En schleut dem Jong doa en. Sej tjield en scheald det Lejnatje Bot sej oul selfst wi mejd – De bossje, öule Hatjsefrü, Deej Tjenja freete deejd. See mast dem oame Pejtetje Ne gounze lange Weatj, Dann heat seej oun dem Backuwe Enn ähre Somatjetj- Doch tum Jletj wie Lejnatje Von tjlin oun seija featjs – Sei stald sech dom en ouschuldech En fruch de boasje Hatjs Os dout ok wertjlech pouse woud Opp see dout racht söu muk: Jemaste, detje, Pejtatje Nü sate oppe Plut … Dout woat oul oules pousse hie, Sehd tredj de oole Hatjs En sad sech oppe Uweplut Mot oule ere Ratj… Futz scheuf det kluge Leinatje De Hatjs em heite Glout… Febrend em Glöut de öle Hatjs Nü weh se entlech döt! En Peitatje en Leinatje Jeletjlich, seja fröu, Hopsade en songe nü En lostjet Leed dotou! Sei rande schwend num Ellrehüs En fonke ok dem Wachj, Sei wulle nü von Ma en Pa Niemuls meia wachj!

Nesj lenjs hod eatj en wetten Dröum... Von eine Wentanacht! Söu klo en frostesj wie de Loft, Von Stierntes oules dach! En opem wetem ladjem Wasj Jentj etj oulein schpeziere, Dej Schneu dej tjwerjtjad unjre Feut, Mi fonk ol on te friere. Deup en minem Pelz festoppt, Hod etj de Nies en Heanj. Deu Wenta wie jewes det Joh Te ons ein betste streanj. Op einmul sach eatj ne Estolt. Deu kom mi eama nuda... Ne röude Meez, ein wetta Boot - Etj brokt nech wieda rude! Ver mi stond nü deu Winachtsmoun, Söu woh, os eatj he sie... Blöus pous opp...Söu fiel etj weut - Es Winachte vebie! Etj tetjd söu niescheresj nu am - (haft flesjt noch en Jeschenjt!) Dan schiemd mi dout: dei Winachtsmoun Deu hiet doch wout eatj deanjtj! En sach heu gonesj lostesj üt.. Söu steal en une Krouft, Gons ladesj wie sien gröuta Sak, De Scholre honke rouf... Wot wie mot am nü blöus pesiet?- Fruch etj dem eulen Moun- Opp heu Vebiestat we, velesjt, Opp etj am halpe koun.

Hei höuf de Ugebrune huch, En tetjd mi iernsthaft on: „Jou, es Wienachte febi, En etj sie meud en om... Ol dei Jeschenjte, dei etj houd, Vedeiljd etj enne Welt, Blöus etj ha noscht nesj tredjjetjree... Etj mein nü nesj det Jelt. Eatj saj die mul, wot tjejna weut : Wot etj tem Leewe brok - Es bleus de Dankbotet de Mensche, Dej ütem deupe Hot. Üt jüne Hotte tjrie etj dej, Dot es mien basta Löun, Von jünem Dank bliew eatj em Liewe, Bleus vom Dank ouleun... Freja wie deu Dank söu gröut, Min Sak wie äma detj, Etj houd jenuch tem wieda schente, Dot muk ons ola retj! Wot es nü ope Welt pesiet? Dei Dankbotet es wasj... Söu wenechj Freed, sou wenesj Leuw, Mi jet det he söu schlachjt... Jidret Tjent op diese Welt En jiedre Frü en Moun Nemt dot scheine Lewe hea Söu selfstfeschtändlesj oun! Dout tjeina krank es ouda om, Dout tjeina hongre deit, En womet Dach haft ewrem Kop, Mot schmoke Tjleida jeit, Dot Tjenja lache äne Stuw, En dot de Deasch es vol... Uba de Mensch es ontefried En op sien Lewe dol. Je retja nü de Mensche send, Söu wenja Wom em Hot….

Etj sej de Tookunft ve jünt schlem… Wou dot noch wore wot…“ De Wienachtsmon hod ütjeridt, Det vold am secha schwo... Am kolad üte Ug ne Tpun, Seu menschlesj heut en kloh... Dei Hemel wie mot Stierntes vol, Etj jenjd oulein min Wasj, Dei wondabore Wienachtsmon Wie straks op einmul wasj... Opjewatjt med enne Nacht, Kun etj nesj moja schlupe… Es dot om ons nü wertjlesj schlem? Op dot wel etj nesj hupe… On mienem wondaboren Dreum Mot eatj nü voken dente... Eatj wel söu jiren dem Winachtsmoun Üt mienem Hot wot schenjte!

OP ONSEM PAPPELBOUM ( Erinnerung)

Ous etj noch tjlin wie, wos bi ons oppem Hof, jenouw ver min Fensta, en Papelboum. Die wie seu machjtech en grout, dout hei mot sine Asta oum Hemmel onschiere deed. En wan mul schwore Rejenwoljte ounkoume, verreute dei oun sine Asta en veschwenjde, dowein wie bi ons Tüs emma klora Hemmel en Sonnenschien. Sine Weede weere sou decht en sou voll mot Blieda, dot do gonech meia derchtutjetje jenjt. Ous wan hei do wout festope deid. En etj wust ok jenouw – wout, beta jesacht – wem! Oul fiele mul houd etj jeseine, dout do gounz buwe, ope hächste Pappelasta tjline Menschtes romrande. Dei wunde do en ere ronde Hüstes, die sou gout vestoppd wiere, dot det Menschehuge dei nech sejne koun. Fleecht mul ein Tjent, en dan ok bleus wan et seia oppousse deejd! Dese Menschtjes, dot send Boumgnome. Jreen em Jesecht, mot Tjleidatjes, schmok jeneht üt Bleeda, mot schpeze Scheutjes op ere Föuttjes. Die send äma freu en seja schaftechj! Den gounzen Dach rane die rom en deune ere Oabet. Oul frü zemorens steiwe de Motasch de Bade üt, seu, dout oule Bleeda oum Boum roschle! Dan gune ok de Vudasch ope Oabet en deune do ve oule Tjenja ope Welt veschiedenstes Spieltech schnezle. Dei schnezle en huwle dout et mo sou tjwerjtjat en knackt! Doet haft jewes oul jidra mul jehiet, die unjrem Pappelboum jeschtune haft. Sogoa die gouns oole Grooßvudasch halpe met, en schrüwe de Reeda on de Schpieltechmeschintjes oun, en die greewe Grooßmotasch seete em Schoute, en näje schmocke Tjleeda fere Pope. Ok de Gnomentjenja habe ere Pflecht – sei mote nu de School. Do gune se uba jirn han, wills dei Lehra ein üha-olla Gnom es, die oules weit, en die fetalt de gounze Tiet siene bütajeweunliche Jeschechte. Dout es seja enteresount! Nu de School ranese oula schwend nu Hüs. De Motasch habe oul det Medach reid, en de Vudasch sent ok oul do. Nu dem ete heule oule Boumgnome ombedenjt Medachschlup – dout jehit sech sou. Danu es Tiet toum Spiele ouda de Nubasch tou besietje. Dout jet om Baste motem Bomel-Bound. Eina heelt sech mot bed Hänj oum Bound foust, en schwenjt sech dort han, wuhan hei gruds Lost haft. Dei Bomel-Bound es ewerhoupt eine seia kluge Sach! Do met jet racht ouda lenjsch, nu fere ouda nu henje,ok nu buwe ouda nu unje tou schwenje en tou hiewe! Lecht en secha! En wan eina nirjens han wel, jet mot dei ouk einfach bloos tou schokle… Openuwent wot et steel opem Boum. Dan setese oula en ere ronde Hüstes en drenjte Preps mot Perschti en Tweibak. Dot jeklappa von ihre pezleene Toustes en Schateltes es oulaweent jeschet tou hiere. Num Unkast bliewe se oula noch en bit sete, bot die ieschte Stirentjes schiene. Ömasch en Öpasch vetale Jeschechte von Früha en mounch eina senjt ouk noch scheene Leida. Wan et dan Tiet es tum Schlupegune, fangt de groute, machtje Pappelboum oun sech tou wiehe, dout oule sine Boumgnome bita enschlupe tiene. Hei wiecht sech, en wiecht, en siene Bleeda rouschle steel enne woame Uwentloft. Uk etj word dann emma gounz schluprech en drehd mi wach vom Fensta ope oundre Sid. Dout es von dan oul viel Tiet wachjerant, en etj sie ella jeworde. Etj ha oul fielet erlieft en jesejne, bleus eins es mi seja schud – dout etj, ok wan etj mi seja ounstrenje deu, op onsem Papelboom tjejne Boomgnome meja seine koun…

WI FLUGE NU DIETSCHLOUNT... Wi fluge nu Dietschlound. Dot wi tem eeschte mul, dot etj fleje deud... Etj sot om Fensta en trüd mi nech rüta tu tetje... Uba etj tjed han und wan doch. Do wiere bleus de wete Woljte unja ons, en opem Hemeleanj wi oules klo en fia-root. Dot wie ol boold Uwent en dej Son jentj kratjt rofa. Soo ein Soneunjagang kon flejst soja schmok ütseine, uba mi wie nesj nu dot. Eeschtens, wie mi omaklesj jeworde. En ons Ältsta, dei bi mi sete deid, wi ok gons mojd en am schloojpad. Hei rotschd han en hea en fonk teine makelje Stead fe sesj. Hei wi ol mest veja, en seja greut fe sin ella. Schliesslesj lied etj am bi mi ope Scheeet en hei schloojp en. Henja ons sot min Moun motem tjlanstem ope Hänj. Dei hod dot fiel jemitelja en Papas bpeede Oarems en we ol lang enjeschlupe. Irjendwu soute ok noch mine Ellre en min Bpouda mot sine Frü en Tjent. Wi fluge nu Dietschlount. Wi honge medden enne Loft mot soone Angst em Bok. Onse Ma seed äma: "Wi mote nu Dietschlound, wi send Dietsche..." En min Moun wul ok do wach, wills hei nech wul dot se onse Jonges enne Ärmoj tjreplesj schlune soole, bloos wils sej dietsche Numes druge... En onse Tonte Ouna vetald ok veschiedenste Jeschechte eewa det leewe än Dietschlound. Sei hod ol miere Johre dort jeleft, dan storf eh Moun en sej bang sesj nu ehre Tjenja en kom dan tredj... Tonte Ouna wi fon Ma äre älste Jeschwesta en zemlesj ella. En wi ol foken seja krank. Sei kum tweschenen fe eine Wetj nu ons tem Speziere, en vetald ons veschiedenes von Freeja en von Dietschlound. En etj must dan ema striede mot ar, etj kon dot oules nech jloowe - wi hode doch enne School wot gons oondret jeliet... Nü es Tonte Ouna ol lang wada en Dietschlound en wi kume nü ok henjaron... Min Seen dreed sech op mine Schoojt en dretjd siene Tjneetes en Elbogentes deep en min Bock nena, mest bot unjre Reebe. Dot wie soo ein Vetrühdes Jefeel... Os wan etj ol wada ein Tjent en mi spere deed... Etj püst am lees sine wete Hoates üte Stirn en schlug miene Oarems om am. Mi wie hoot en omaklech, uba etj kompft dojejen on, vesocht mi toberühe en än Jedanken optoolente - dot etj am nech watje brokd, dot etj sien Jewecht op miene Schoot, sine Woom on mi noch lenja spere kun... Etj tjetd ope Üa - det wud ol nech lang diere, dan send wi doa... Äm oundre Lound, äm oundre Leewe. Wot tjemt ons do entjehen? Weeu seele wi onfange? Weu wot dot wore? Wi wore ons gouns omendre mote... Wi hode ons fiel iewalasjt, fiel romjefrocht en romjehorjcht. Dot gof veschiedenste Jeschechte, uba wi kunne ons dot doch nesj feestale, weu dot seene wud. Dej Mensche, dej luta nu Dietschloud koume, dej wuste ol fiel moja. Dej wuste, wot sej wule...Uba fe mi wie det ooles toop os ein Schret en eine diestre Stuw - etj stond ope Schwal en wul bloos mine Tenja on mi drete en de Hond von mienem Moun nesj looslute... Dot tätjad en bit en stockad - dan wie wie ope Eed. De Tjenja worde wach, en min Seen ok. Hej tjetd mi frogend mot siene bleewe Uges on. Wie moste ons reedmoke tem ütstie. Etj nom am fost on siene wome Hond, en dem Tjlinem opem Oarm. Fuz schlug hei siene dete Oaremtes om min Hols en dretjd sesj on mi. Hej wi noch mood en hod sesj nu Mama jebangt. De Mana jene mot de Tousche verop, en wi schuwe ons mote Tjenja henjaroun. De Mensche wiere opjerecht en mojd vone lange Rees, en wule schwend rüta. Langsom jenj wie oula toop de Trap ronta. Ouf eina von ons donn jedocht haft, dot det onse lazte Schreed weere op dessem Bodem. Wie wule oula bloos schwend rüt hea, enne fresche Loft, en dot nieje Leewe...